Hvað eru margir bílar í Reykjavík?

Á heimasíðu Hagstofunnar er að finna upplýsingar um fjölda skráðra ökutækja á Íslandi og má þar sjá tölur fyrir mörg af stærri sveitarfélögum landsins. Því miður eru nýjustu upplýsingarnar frá árinu 2006 en gera má ráð fyrir að bílum hafi fjölgað eitthvað á landinu síðan þá þar sem gengi krónunnar var innflytjendum afar hagstætt alveg fram á árið 2008.



Samkvæmt þessum upplýsingum Hagstofunnar voru 110.706 ökutæki skráð í Reykjavík í lok árs 2006. Af þessum bílum voru langflestir fólksbílar, rúmlega 86%. Á höfuðborgarsvæðinu öllu voru hins vegar 153.590 ökutæki. Skiptingin í einstaka flokka var eftirfarandi:

Flokkur	Reykjavík	Höfuðborgarsvæðið	Landið allt
Öll ökutæki	110.706	153.590	227.321
Fólksbílar	95.996	134.511	197.305
Hópbílar	914	1.155	1.929
Vörubílar	4.585	5.807	10.176
Sendibílar	9.211	12.117	17.911
Vélhjól	1.961	3.422	5.699

Til gamans má geta þess að á sama tíma voru íbúar í Reykjavík 17 ára og eldri alls 88.541. Það þýðir að það var rétt um 1,25 ökutæki, eða rétt rúmlega einn fólksbíll ef sá flokkur er aðeins tekinn, á hvern einstakling á bílprófsaldri í höfuðborginni. Bílaeign Reykvíkinga er hlutfallslega aðeins meiri en þegar litið er á landið í heild því í lok árs 2006 var eitt ökutæki á hvern einstakling á Íslandi 17 ára og eldri, eða 0,88 fólksbílar.

Frekari fróðleikur á Vísindavefnum:

• Hvað eru til margir bílar í öllum heiminum? eftir Gylfa Magnússon
• Hvað eru til margir bílar á Íslandi? eftir EDS

Heimild og mynd:

• Hagstofa Íslands. Skoðað 4. mars 2009
• Mynd: TeleNav Blog. Sótt 4. mars 2009.

---