Fjármálafyrirtækjum er skylt að þekkja deili á viðskiptavinum sínum og framkvæma sérstaka áreiðanleikakönnun á þeim. Með áreiðanleika-könnun er átt við upplýsingaöflun um fyrirhuguð viðskipti og könnun á áreiðanleika upplýsinga um viðskiptavin.
Hvenær þarf að framkvæma áreiðanleikakönnun?
Meginreglan er sú að viðskiptavinur fari í gegnum áreiðanleikakönnun við upphaf viðskiptasambands. Þetta þýðir að ef viðskiptavinur er nýr í viðskiptum þá ber fjármálafyrirtæki skylda til að kanna áreiðanleika hans áður en stofnað er til viðskipta.
Þeir viðskiptavinir sem nú þegar eru í viðskiptum en hafa ekki farið í gegnum áreiðanleikakönnun þurfa einnig að sanna á sér deili.
Hvernig fer áreiðanleikakönnun fram?
Viðskiptavinur þarf að gefa upp nafn sitt og aðrar persónugreinanlegar upplýsingar. Til að staðfesta að framangreindar upplýsingar séu réttar skal viðskiptavinur framvísa gildu persónuskilríki sem gefið er út af stjórnvöldum eða er viðurkennt af stjórnvöldum.
Hvaða skilríki teljast gild persónuskilríki?
VEGABRÉF
ÖKUSKÍRTEINI
NAFNSKÍRTEINI
Hvers kyns greiðslukort, svo sem kredit- eða debetkort með mynd eru ekki löggild skilríki.
Sjá nánar hér á vef SFF.